Hallo Zusammen
Gibt es hier im Forum auch Schweizer, die Songs selber schreiben??? Ich schreibe viel auf Schweizer-Deutsch, kenne aber wenige, die das ebenfalls machen.
Hier mal ein Text von mir auf Schweizer-Deutsch:
PARKBANKBESITZER
Jede Dag sitzter im Park und füetere dVögel
Mit altem Brot wonär nümm cha ässe
Är summt drbi lislig vor sich ane
Die woner gliebt het hän ihn scho vergässe
Är läbt vo Dag zu Dag, jede Dag chli andersch
Sini Auge gsehn numme no das woner will
Är het scho mänge Dag ufem Buggel
Är isch alt und weiss scho so vill
Mängisch sitze chlini Chinder näbe ihn
Denn verzellt är ihne Gschichte vo sim Läbe
DChinder bechömme grossi rundi Auge
Und keins getraut sich irgendöbis zsäge
Gschichteverzeller
Augeblickgniesser
Vogeldompteur
Parkbankbesitzer
Är liebt dSunne wo hell und warm
Dur dBlätter dr Parkbank begrüesst
Är luegt gärn zue wie sich es Binli
Honig holt und sich sLäbe versüesst
Es ischem egal öb dSunne schiint
Öbs haglet schneit oder windet
Wie lang es Johr oder e Stund isch
Wenn dSunne chunnt und wenn sie verschwindet
Do im Park fühlt är sich wohl
Dr Park isch für ihn wie sis zweite Dehei
DLüt wonen gsehn freue sich immer
Är freut sich au und isch doch so ellei
Gschichteverzeller
Augeblickgniesser
Vogeldompteur
Parkbankbesitzer
Es isch Sunntig gsi im Herbscht
Dr Bach het gruscht dVögel hän gsunge
Dr Wind het dBlätter verweiht
DBlueme sin verwelkt gsi dSunne het gschunne
Är isch blibe sitze, still und befreit
Me hätt chönne meine är würdi chli schloofe
DVögel hän druurig gwartet
Und dSchoggi für dChinder isch scho verloffe
Dr Bach fliesst still an ihm verbi
Är nimmt sini Gschichte und dreit se uf Wälle
Är dreit se witer, abe zum Meer
Und wird se dört witerverzelle
Gschichteverzeller
Augeblickgniesser
Vogeldompteur
Parkbankbesitzer
© by Jonas
--
Grüsse aus der Schweiz aus dem Kaff bei dem der Zug nur jede Stunde hält!!!
Joni
lausig kommt nicht von Lausen (mein Kaff in der Schweiz)
Suche
Mitglieder
Kalender
Hilfe
